İngiltərənin "Everton" klubu Araz Abdullayevin transferini rəmsən təsdiqləyib. Fanat.az xəbər verir ki, Liverpul təmsilçisi bununla bağlı rəsmi saytı vasitəsi ilə açıqlama yayıb.
"Everton"un rəsmi açıqlamasında bildirilir ki, Arazla ilkin müqavilə imzalanıb. İstedadlı futbolçunun hazırda "Neftçi"də çıxış etdiyi və bu yaxınlarda Liverpula səfər edərək, tibbi müayinədən keçdiyi vurğulanır. Artıq müqavilənin şərtləri razılaşdırılıb. İndi Arazın Böyük Britaniyada yaşaya bilməsi üçün işçi vizası alınmalıdır. Bu baş tutacağı halda "Everton" futbolçumuzla iki illik müqavilə imzalayacaq.
"Yarımmüdafiəçi olan Abdullayevin beynəlxalq miqyasda debütü cəmi 16 yaşında olub. Ancaq onun ən yadda qalan qolu 21 yaşlılardan ibarət yığmasının heyətində martda Şotlandiyaya səfər oyununda vurduğu qol olub. O, Azərbaycanda ən parlaq oyunçulardan sayılır. İlk peşəkar oyunu 2008-ci ilin oktyabrın 5-də olub. Bundan 6 gün sonra Azərbaycan milli komandasında debüt edib", deyə "Everton"un açıqlamasında bildirilir.